Të pasurit kërkojnë të bëhen më të pasur
Të varfërit të mos jenë më të farfër.
-Zgjidhja ?
-?
Por kjo botë kështu është ndërtuar
Dhe sherret do zhurmojnë gjithë jetën.
Të pasurit do mendojnë si të pasur
Të varfërit, si të varfër patjetër.
Dhe kjo për arsyen e thjeshtë
Se si jeton dhe mendon njeriu.
I pasuri gjithë botën e do në pjatë
Bukën e përditshme do i varfri, fatziu.
Dhe sikur të ndrronin vendet për një çast,
Prapë në botë s’do kishte barazi.
Të pasurit si të varfër do mendonin
Të varfërit si të pasur, gjithsesi.
Prandaj nuk është e lehtë t’i gjesh fillin
Kësaj bote të pleksur keq e mos më keq.
Shpesh djalli shfaqet i bardhë si engjëll
Dhe engjëlli më i zi se një dreq.
Dhe që të qetësohet zemërata
Politika gjeti zgjedhjen e lume:
Një herë turmat votojnë djathtas
Kur zhgënjehen, pastaj majtas sulen.
Dhe në këtë lojë dinake e të ashpër
Platea paguan nga të dy anët
Kurse politikanët gjuhëgjatë
Ndërrojnë karriket e radhës…
-2-
Por turma prapë shpreson, harron e gjora
Dhe sërish në mitingje pas oratorëve…
Buçasin sheshet nga thirrjet patetike:
‘Kësaj radhe do zgjidhen hallet tona’.
Ata që premtuan parajsën nëpër sheshe
U ngjitë tani lart, në qeveri.
Fytyrëngrysur, të menduar,
Që seriozisht punojnë për lumturi!
Të kujt? Të turmave është e pamundur!
S’mund të ketë lumturi kolektive…
Prandaj, me sedër, i zë gjumi në shkresa
Për lumturinë e familjeve të tyre…
I keni pare sa humanë janë?!
Si leshen e përleshen për popullin e varfër
Vërtet janë skena sentimentale, prekëse..
Dhe populli kështu i ndjen më afër..
I keni parë kur flasin për varfërinë
Në stërintervista e stërtakime?
I keni parë unazat prej sheikësh nëpër gishta?
Disa prej tyre si homo përdridhen.
Shikoni si ngrehosen politikanët tanë,
Veturat luksoze,të gjithë me ‘Mercedes’
Shikoni si ju shkëlqejnë faqet, kostumet firmato,
Që në botë vetem një miliarder i vesh.
Shikoni deputetët, shumë prej tyre ordinerë,
As sa qytetari mesatar i këtij vendi,
Marrin poza duke folur, që të shkulin të vjellat,
Duke lexuar tekstet, që s’ua pret mendja.
Tekste që ua kanë shkruar të tjerët
Për njëqind euro apo dollarë
Nga ata të redaksive të gazetave
Apo të tjerë intelektualë.
Dhe s’kuptojnë asgjë nga ato që thonë
Byk e kashtë, mjerane oratoria…
Dhe pastaj, po deshe, thuaj je përfaqësuar
Në Kuvend, ku merr vendime Shqipëria.
Ne duhet të kemi më shumë respekt për veten,
Që të na respektojnë politikanët më pas.
Po kur zgjedh deputetë tregtarë gjelash,
Nuk ke si pret vezën, po glasën…
Kështu nuk mund të presësh fat tjetër
Nga ky, që jemi ngopur gjer tani.
Ndaj zgjidhja është: të dish të zgjedhësh,
Të shpresosh një jetë më të denjë si njeri.
Më kot ankohemi në punë, në shetitje
Na lodhën këta politikanë mediokër, zevzekë.
Fajin e kemi vetë: o të zgjedhim ata që duhen,
O të bojkotojmë masivisht zgjedhjet!
Ky do të ishte mësimi më i mirë
Që mund të japim për të mirën e përgjithshme,
Ndryshe zgjedhjet janë një lodër e radhës
Dhe ne të gjithë-viktima të mërzitshme.
Dhe që të fillojë të ndreqet diçka
Të zgjedhurit t’i propozojë populli,jo partia
Kështu së paku është gjysma e së keqes
Dhe na mbete ne përgjegjësia.
Po njerëzit kurrë nuk do të kënaqen,
Se ata që hypin lart, njëlloj mendojnë.
Prandaj të bëhen gati për durim të gjatë
Dhe më mirë do të ishte të… ëndërrojnë..
Petrit Qejvani.