Këshillë për Aa
Ka kohë që nuk të kam parë
Dhe të të shoh më, nuk dua,
Shëtis i qetë në varrezat e kujtimeve
Me qiriun e pendimit në duar.
Më ler të qetë në vetminë time,
Ku zemra brinjët m’i shkallmon
Dhe truri i lodhur nga mendimet
Veç paqe e harrim kërkon.
Unë e di, që një tjetër ti do
Njëlloj si më deshe dhe mua.
Paçka se atij i betohesh
Sa ti, asnjë tjetër nuk dua.
Sidoqoftë, për një gjë të veçoj:
Që me zemrën luan kaq lehtë
Si ish mik, një këshillë po të jap:
Kështu miq s’ke për të pasur në jetë.
Petrit Qejvani
