Në gazetën “Kallarati” Nr. 46 u botua një shkrim imi me titull: “Cila penë ?”, në të cilin ndër të tjera thuhej: “Kallarati…meriton të ketë historikun e tij të shkruar…Se cili autor do marrë përsipër këtë detyrë nderi, nuk e dimë, por kemi besim…se me siguri do na jepet një dhuratë e tillë”.
Dhe ja, këtë dhuratë na e bëri një bir i nderuar i fshatit tonë me penën e tij, z. Enver Strataj. Në librin që botoi vitin që shkoi, “Historiku i Kallaratit”, ai i bënte një “biografi” të hollësishme fshatit që nga lashtësia e deri në ditët tona. Kjo vepër, krahas punimeve të tjera të bëra deri në vitin 1990 nga komisioni që kish ngritur fshati për historikun e fshatit, përbën një bazë të plotë për përpilimin e një historiku përfundimtar, “zyrtar” do thoshja, nga ndonjë komision i posaçëm që mendohej të të ngrihej, siç është folur në kryesinë e Shoqatës, me krijues të kualifikuar. për këtë punë. Por sot për sot kjo është vepra historike më e plotë e më e zgjeruar për fshatin tonë që Enveri nxorri në dritë dhe e shpërndau bujarisht falas, në formë dhurate pë të gjithë bashkëfshatarët e më gjerë. Kjo punë meriton respekt e admirim. Prandaj ne e falënderojmë dhe e pegëzojmë me shpirt Enverin për këtë dhuratë të shkëlqyer që na bëri.
Qofsh i lumtur familjarisht dhe përshëndetje z. Enver!
Xhelo DAUTAJ
Botuar ne Nr. 58 te gazetes Kallarati
