Europa kaq afër e nuk e gjejmë dot
Si të lozim symbyllazi me fatin tonë
E dimë ku duhet të vemi
Por s’dimë si të vemi
Dhe sillemi rrotull si kali në lëmë
Lidhur te huri
Dhe ndrrojmë kahun e lëvizjes rrotull tij
Sipas alternativave
Që nuk kanë sy.
Si kali gërdallë i lirisë sonë qesharake
Sillemi rrotull hurit fiks të politikës
Dhe ndonse shkumëzojmë
Me emrin e Europës në gojë
Pallatet e qelqtë të Brukselit
Nuk e pëlqejnë zërin tonë të ngjirrur
Duke na lënë në dorë të të zotit
Që godet kalin
Që shin gjithë ditën
Farën e mashtrimit.
Petrit Qejvani